अरोग्यनमा ऑनलाईन- फळांच्या गरात भरपूर फायबर भरपूर प्रमाणात असतात. याशिवाय ए, बी, सी, ई आणि के ही जीवसत्वं आणि खनिजेही फळांमधून आपल्याला मिळतात. गऱ्यासोबतच सालीचेही शरीराला अनेक फायदे असतात. ज्याकडे आपण अनेकदा दुर्लक्ष करत असतो. आज याचंच महत्त्व आपण जाणून घेणार आहोत.
झाडावर लागलेल्या फळांच्या सालीत सुर्यकिरणांमुळं वेगवेगळी पिगमेंट्स तयार होत असतात. या नैसर्गिक पिगमेंट्समुळं फळांना त्यांचे विशिष्ठ रंगही प्राप्त होत असतात. कॅरोटीनॉईड आणि फ्लॅवेनॉईड ही पिगमेंट्स देखील फळांचं संरक्षण करत असतात. यामुळंच आपली रोग प्रतिकारक शक्तीही वाढते. फळं खाल्ल्यानंतर त्यातील कॅरोटीनॉईड्स शरीरात जाऊन ए जीवनसत्वात परावर्तीत होतात. डोळ्यांच्या चांगल्या आरोग्यासाठी ए जीवनसत्व मदत करतं. फ्लॅव्हेनॉईड्सही रोगप्रतिकारक शक्ती वाढवत असल्यानं दमा किंवा हृदयविकारांसारख्या आजारांना प्रतिबंध करण्यासाठी ती फायदेशीर ठरतात. फळांच्या सालीत फायबर म्हणजेच तंतुमय पदार्थही पुष्कळ प्रमाणात असतात.
आपण कमी वेळात जास्त फळांचा रस पिऊ शकतो. परंतु यामुळं शरीरातील साखरेची पातळी आणि कॅलरी लेवल वाढते. याऊलट जर फळं चावून खाल्ली तर शरीरात तुलनेनं कमी कॅलरीज जातात. उदा. सफरचंदाच्या एक ग्लास रसातून 115 कॅलरीज आणि 0.5 ग्रॅम फायबर मिळतं. तर 1 सफरचंद खाल्ल्यानंतर 54 कॅलरीज आणि 2.4 ग्रॅम फायबर मिळतं. त्यामुळं फळ खाणं शक्य नसल्यास तुम्ही फळांचा रस घेऊ शकता. परंतु तो घरी बनवलेला आणि न गाळलेला असावा. वृद्ध आणि लहान मुलांना याचा फायदा होतो. परंतु शक्य असल्यास अख्खं फळ खाण्याला प्राधान्य दिलेलं कधीही चांगलं.
सालीसकट फळ खाल्ल्यास मिळतील हे फायदे –
– बद्धकोष्ठता दूर होते
– फायबरमुळं शरीरातील लो डेन्सिटी लायपोप्रोटीन ( एलडीएल/बॅड कोलेस्ट्रॉल) कमी करण्यास फायदा मिळतो.
– फळांच्या काढलेल्या रसात फायबर नसते. यामुळं फायबरचा फायदा मिळत नाही जो फक्त फळ खाल्ल्यानंतर मिळतो.
– फळांच्या ब्रँडेड रसात साखऱ जास्त असते. यातून मोठ्या प्रमाणात कॅलरीज शरीरात जातात. हवी ती पोषकतत्वे मिळत नाहीत. त्यामुळं फळांचा रस, किंवा बाजारातील फळांचा रस पिण्यापेक्षा फळ खाल्लेलं कधीही चांगलं.
कोणती जीवनसत्वं कोणत्या फळात असतात ?
1) व्हिटॅमिन ए – आंबा, पपई, पेरू, ताजे अॅप्रिकॉट(जर्दाळू), पॅशनफ्रूट
2) व्हिटॅमिन सी – संत्री, मोसंबी, स्ट्रॉबेरी, किवी, अननस, काळी द्राक्षे, पेरू, खरबूज, टरबूज
3) व्हिटॅमिन बी, ई आणि के – खजूर, पीच, डाळिंब, केळी, लिची, पॅशनफ्रूट, पेरू.
टीप :- वरील लेख हा माहिती म्हणून देण्यात आलेला आहे. यातून आम्ही कोणताही दावा करत नाही. त्यामुळं काहीही करण्याआधी एकदा डॉक्टरांचा किंवा तज्ज्ञांचा सल्ला नक्की घ्या. प्रोफेशनल अॅडव्हाईस म्हणून या लेखाचा वापर करू नये.
काही गोष्टी काहींना सूट होतात तर काहींना सूट होत नाहीत. तसेच काही लोकांना काही पदार्थांची अॅलर्जीही असते. त्यामुळं तुम्हाला अॅलर्जी असणारे पदार्थ वापरणं टाळावं.