आरोग्यनामा ऑनलाईन- हिव्याळ्यात(winter) आपण बघतो की, आपली त्वचा ही कोरडी पडत असते. अनेकांना असा प्रश्नही पडत असेल की, हिवाळ्यात(winter)असं नेमकं कशामुळं होतं. आज आपण याचबद्दल सविस्तर माहिती घेणार आहोत.
त्वचा कोरडी का पडते ?
आपली त्वचा म्हणजे एक संरक्षणात्मक कवच आहे. याचे दोन भाग असतात. अंत:त्वचा (डर्मिस) आणि बाह्यत्वचा (इपीडर्मिस) असे हे दोन भाग आहेत. बाह्यात्वचेत पेशींचे एकावर एक अनेक थर असतात. हेच थर जीवाणू, विषाणू आणि इतर रोगसंक्रमणासाठी सुरक्षाकवच म्हणून काम करतात. सर्वात आतील थर जो असतो तो नियमितपणे नव्यानं तयार होत असतो. बाहेरील थर मृत होतो. अंत:त्वचेत मेदाम्लाचा थर असतो. या थरात तैलग्रंथी (सेबॅशियस ग्लॅंड) आणि घर्म ग्रंथी (स्वेट ग्लँड) असतात. तैलग्रंथीत सिबल स्रवले जातात. हे सिबम केसांच्या बीजकोषाला तेल पुरवतं. या केसाच्या बीजकोषातून केसाची निर्मिती होते, केस आणि तेल/सिबम ग्रंथीच्या नलिकेतून त्वचेवर येतात. त्यामुळं त्वचा मऊ रहाते. घर्मग्रंथीमध्ये घाम स्रवला जातो. घामात युरिया, अमिनो आम्ल, पाणी, उष्णता असते. त्यामुळं शरीरातील तापमान व क्षार नियमनाचं काम सुरळीत सुरू असतं.
थंडीत त्वचेतील सर्वात बाहेरील पेशींचा थर हा मृत होतो आणि झडून जातो. त्वचेला रखरखतेपणा येतो. यालाच आपण त्वचा फुटली असं म्हणतो. याशिवाय वातावरणातील तापमान आणि हवेतील आर्द्रता कमी झाल्यानं त्वचेतून ओलसरपणा बाहेर टाकला जातो, तैलग्रंथींचं कार्य मंदावतं आणि त्वचेला कोरडेपणा येतो.
टीप :- वरील लेख हा माहिती म्हणून देण्यात आलेला आहे. यातून आम्ही कोणताही दावा करत नाही. त्यामुळं काहीही करण्याआधी एकदा डॉक्टरांचा किंवा तज्ज्ञांचा सल्ला नक्की घ्या.
प्रोफेशनल अ‍ॅडव्हाईस म्हणून या लेखाचा वापर करू नये.
काही गोष्टी काहींना सूट होतात तर काहींना सूट होत नाहीत. तसेच काही लोकांना काही पदार्थांची अ‍ॅलर्जीही असते. त्यामुळं तुम्हाला अ‍ॅलर्जी असणारे पदार्थ वापरणं टाळावं.
