आरोग्यनामा ऑनलाइन टीम – एचआयव्ही या गंभीर आजारावर अजूनही ठोस उपचाराचा शोध लागलेला नाही. या रूग्णांना जीवनभर औषधे घेऊनच दिवस ढकलावे लागतात. सुरूवातीस काही उपाय व औषधांनी हा आजार नियंत्रणात येतो. परंतु, नंतर पुन्हा तो त्रास देण्यास सुरूवात करतो. एचआयव्ही आजाराने पीडित व्यक्तीच्या शरीरात सुमारे दोनशे अरब सीडी ४ टी पेशी असतात. त्यातील १० लाखांपैकी कोणतीही एक पेशी एड्सचा व्हायरस लपविण्याचे काम करते. हा व्हायरस कोठे लपतो, याचा शोध लावल्याचा दावा फ्रान्सच्या सीएनआरएस रिसर्च इस्टीट्यूटच्या संशोधकांनी केला आहे.
काय म्हटले संशोधकांनी
१) संशोधनानुसार, मानवी शरीरातील पांढऱ्या रक्तपेशींमध्ये एड्सचा व्हायरस लपतो.
२) शरीरातील पांढऱ्या रक्तपेशीच या व्हायरसला जागा देत असल्यामुळे एचआयव्हीवर नियंत्रण मिळवणाऱ्या औषधांना हा व्हायरस दाद देत नाही.
३) एड्सच्या व्हायरसचे लपण्याचे ठिकाण सापडणे हे एक मोठे पाऊल असल्याचे या संशोधकांनी म्हटले आहे.
४) लवकरच पांढऱ्या पेशींमधल्या एड्सच्या व्हायरसचे समूळ उच्चाटण करण्याबाबतचा उपाय शोधला जाईल. त्याबाबत दूरगामी संशोधनही सुरू झाले आहे.
५) हे संशोधन यशस्वी झाल्यास एड्सचा व्हायरस नेस्तनाबूत करणे शक्य होणार आहे.
६) एड्सवरील उपचारासाठी अनेक प्रकारची संशोधन होऊनही प्रभावी औषध उपलब्ध झालेले नाही.
