आरोग्यानामा ऑनलाइन टीम : डोकेदुखी का होते, याचा शोध घेतल्यास अनेकविध कारणे स्पष्ट होऊ शकतात. डोकेदुखीचे निदान वेगवेगळे असू शकते. यासाठी डोकदुखीवर पेनकिलर घेण्याऐवजी डॉक्टरांकडे जाऊन डोकेदुखीचे कारण समजावून घेऊन मगच औषधोपचार केले पाहिजे. तरच डोकेदुखीचे समुळ उच्चाटन होऊ शकते. केवळ वेदना शमविणे हा डोकेदुखीवरील उपचार नव्हे. डोकुदुखी घालविण्यासाठी त्याचे निदान, कारणे आणि लक्षणे यांचा अभ्यास करून औषधे पाहिजेत.
डोकेदुखीची जी विविध कारणे आहेत, ती प्रथम आपण जाणून घेऊयात. कारण डोकेदुखी कोणत्या कारणामुळे होते, हे माहित असल्यास केवळ वेदना शमविण्याकडील आपला कल कमी होईल. शिवाय, रोगदेखील समूळ नष्ट होईल.डोकेदुखीच्या विविध कारणांपैकी पहिले कारण म्हणजे मानसिक तणावामुळे येणारी डोकेदुखी होय. सर्वात जास्त आढळणारा प्रकार आहे. डोके जड वाटणे, झोप न येणे, कामात लक्ष न लागणे, मुंग्या जाणवणे, उजेड व आवाज यामुळेही त्रास होतो. दुसरे कारण आहे अर्धशिशी. डोकेदुखीसोबत मळमळ, भूक नाहीशी होणे, उलटी होणे ही लक्षणे दृष्टीशी निगडित असू शकतात. अंधारी येणे, काळे अथवा रंगीत ठिपके दिसणे, चक्कर येणे, असा त्रास होतो. तसेच नाकाच्या दोन्ही बाजूस कपाळावर (भुवईच्या वर) आवाज घुमण्यासाठी ज्या पोकळ्या असतात. त्यात सर्दीमुळे नाकात उघडणारी छिद्रे बंद झाली की कफ साठायला लागतो. त्या दुखायला लागतात.
या त्रासाला सायनुसायटिस म्हणतात. खाली वाकणे, आडवे पडणे, धक्का- हादरा यांनी वेदना वाढतात. ब्लडप्रेशरमुळेही डोके दुखते. यामुळे सकाळी उठल्याबरोबर डोक्याच्या मागच्या भागात वेदना होतात. त्याचबरोबर घाबरेघुबरे होणे, छातीत दुखणे, श्वास जड होणे, चक्कर येणे, असा त्रास होतो. डोळ्यांचे आजार असल्यास डोकेदुखी होऊ शकते. काचबिंदूसारख्या आजारात डोळ्यांतील दाब वाढतो. तीव्र प्रकारची डोकेदुखी, डोळे लाल होणे, दृष्टी अधू होते. आम्लपित्त या त्रासामुळे डोकेदुखीबरोबर पोटात आग होते, मळमळते, छातीच्या हाडाच्या खाली वेदना जाणवतात. उलटी होऊन पित्त पडल्यावर आराम वाटतो. तसेच दातामधील किड, दातांच्या मुळांना सूज येणे, यामुळेसुद्धा डोकेदुखी होते. अशावेळी वेदना दातात सुरू होऊन डोक्याकडे जाताना जाणवते. जबड्याची हालचाल करताना त्रास होतो. म्हणून डोकेदुखीवर डॉक्टरांच्या सल्ल्याशिवाय औषधी घेऊ नये. डोकेदुखीवर पेनकिलर घेतल्यास मुळ आजार तसाच राहील,आणि त्याचे गंभीर परिणाम भविष्यात आणखी त्रास देऊ शकतात.