आरोग्यनामा ऑनलाइन टीम – कोणताही आजार होण्यापूर्वी आपले शरीर या आजाराचे संकेत देते. या संकेतांकडे गांभीर्याने पाहिले पाहिजे. ही लक्षणे जर वेळीच ओळखली तर भविष्यातील गंभीर आजार टाळता येऊ शकतो. शिवाय, समस्येचे वेळीच निदान झाल्याने औषधोपचार सुरू करता येतात.
डिस्पेनिया म्हणजेच श्वास घेण्यास त्रास हा हृदयाशी संबंधित सर्वात सामान्य संकेत आहे. यामुळे व्यक्तीला श्वास घेण्यास त्रास होतो. ही कार्डिएक किंवा पल्मोनरी म्हणजेच फुप्फुसाशी संबंधित आजाराचीही लक्षणे असू शकतात. अशावेळी चालताना, धावताना, पायऱ्या चढताना, काम करताना किंवा काही पावले चालल्यावरही श्वास घेण्यास त्रास होतो. दुसरा संकेत म्हणजे छातीत दुखणे होय. यास वैद्यकीय भाषेत एंझायमा म्हणतात.
अस्वस्थ, छातीत दाबल्यासारखे किंवा शरीर सुन्न होण्यासारखी लक्षणे दिसून आल्यास ती हृदयाच्या त्रासाशी संबंधित आहेत. याकडे गांभीर्याने पाहिले पाहिजे. तसेच हृदयाचे ठोके अनियमित होणे देखील हृदयरोगाचा संकेत आहे. साधारणत: लोक आपल्या हृदयाच्या सामान्य वेगापासून अनभिज्ञ असतात. हृदयाचे ठोके वेगाने किंवा मंदगतीने होत असल्यास त्याकडे कानाडोळा करू नये. अशावेळी पीडिताला मान किंवा छातीत चावल्यासारखे आणि दाब पडत असल्यासारखे जाणवते.
तर दम लागणे, अचानक डोके दुखणे, चेतनेत कमतरता येणे, घामाने भिजणे आणि घाबरल्यासारखे वाटणे इत्यादी लक्षणे हृदयरोगांशी संबंधित असू शकतात. थोडेसे काम केल्यास लवकर थकवा येणे किंवा दम लागणे हे किडनी आणि लिव्हरची कार्यप्रणाली बाधित होण्याचे संकेत आहेत. असे गॅस्ट्रोइंटेस्टिनल किंवा मधुमेह झाल्यावरही होऊ शकते. त्यामुळे याकडेही गांभीर्याने पाहावे.
